Pausahaan Daerah Teu Nguntungkeun Kudu Dikumahakeun?

SAKITU pangagung mere lampu koneng dumeh pausahaan daerah kudu dievaluasi lantaran teu bisa mere kontribusi keur pangasilan asli daerah, tetela ditanggapi dingin-dingin bae kunu ngokolakeun eta pausahaan. Nangtang? Buktikeun atuh, eta omongan tiditu-tidieun dumeh pausahaan milik daerah kudu dibubarkeun, jawab ku bukti kalawan nyata (lain hartina bubuk roti dina mata). Jah… cek urang wetan tea mah, ulah jenuk uget lah…..!

“Kunaon Mang, enjing keneh tos kukulutus ka saha? Geuningan nyabit-nyabit pausahaan daerah sagala? Sugan Mamang hoyong janten direktur atanapi kumaha?” Si Otong nanya tiheula.
“Kaula mah teu hayang teu ieuh, komo digolangkeun ku Mamang anu katelah jalma bodo. Dalah ku jalma pinter ge, endi atuh…..” tembal Mang Suadma,

“Tapi kunaon Mamang ngomentaran pausahaan milik daerah, sapertos nu enya ngartos bae kana eta urusan bisnis teh?” tanya Si Otong.
“Lain masalah ngarti henteuna, tapi aneh hayang ngamajukeun pausahaan daerah jiga nu hese beleke, nya pedah naha. Sakola atuh ka tukang bubur kacang ijo, ukur dibere modal sakali ku dunungan, kadituna ngagorolong sorangan tur bisa nguntungkeun keur dirina, kulawarga malahan keur masarakatna oge. Teu era ku pausahaan jalma lembur model kitu? Asa kacida, piraku, ter-la-lu…..!” omong Mang Suadma.

“Leres oge nya Mang, kana kituna mah teu ngabibisani seueur pendapat dumeh pausahaan daerah kedah dibekukeun heula, nembe kapayun dicairkeun deui ku nu tiasa ngokololakeun eta pausahaan daerah. Piraku pangeusi lembur anu jumlahna ngajuta teu aya nu mampuh saurang-urang acan kanggo mamajukeun eta pausahaan. Sok emutan ku Mamang,” tembal Si Otong.

“Nyaho teuing Tong, kaula mah. Ngabandunganana matak menit kana babatok. Papada aya pausahaan daerah anu meunang bati ladang tina episiensi, lain bati eta mah, hasil tina ngentelan peujit. Anu disebut kauntungan mah tina ladang perkembangan hasil usaha, lain sakabeh biaya oprasional dikurudan bari jeung maju hanteu. Eta kauntungan ukur tamba era atawa tamba bau sungut, sugan alus pausahaan model kitu teh. Bati pausahaan ladang ngurud anggaran, eta mah sarua jeung boga bati ladang nelegan ciduh, uyuhan teu langlayeusueun oge,” cek Mang Suadma, panjang lebar.

“Kedah dikumahakeun atuh Mang, eta pausahaan anu teu ugat-uget bae di enggon teh? Si Otong malik nanya.

“Anu katelah jalma pinter ge teu becus ngokolokeun eta pausahaan, komo lamun dicekel ku jalma anu teu nyakola, meureunan tambah parah. Tibatan eta pausahaan daerah teu matak nguntungkeun kudu dikumahakeun? Asa leuwih tegep naha rek dibubarkeun atawa balikeun deui ka dinas teknis da baheula ge teu ibur teu naha. Nepikeun alesan teu majuna pausahaan daerah boleh-boleh saja, ngan tarekah anu kudu dipilampah ambahanana kudu leuwih lega. Ari alesan digede-gedekeun, jiga nu nandangan pasualan luar biasa, tapi tarekahna ukur biasa-biasa bae, preeet…..!” cek Mang Suadma.(Kang Emsul)